Kon hulle nie destyds dink aan plastiek sakke nie?

Julie 1988, Die Burger

Visse te koop in Kompanjiestuin
Deur HANNES MALAN, Stadsverslaggewer 'n GOUDVISSIE is 'n rustige dingetjie om in 'n sitkamer aan te hou. Baie mense sal voel die ou goedjies se rustige bewegings streel hulle in die gejaagde stadslewe van vandag. Hier kom nou 'n kans om enetjie aan te skaf. Die Kaapse stadsraad verkoop môre-oggend in die Kompanjiestuin hul oortollige goudvissies. Die verkoping begin om 9 vm. en geskied in die geurige atmosfeer van die roostuin. Jy sal jou lengte en kleur kan kies - byna soos gordyne in 'n nuwe huisvestingsprojek - en glo teen billike pryse. Maar jy sal nie meer as drietjies kan koop nie. Vissie-liefhebbers moet hul eie houers saambring. Miskien sal 'n groot plastiekemmer geskikter wees as 'n glasbolbak wat so maklik breek. As jy van groot Japanse koi's hou - van so 300 mm - sal jy R70 stuk moet uithaal. Groteres kos R100. As dit duur klink, onthou: in winkels kos die pragvissies baie meer. Die koi is die soetste troeteldiertjies, omdat hulle so mak word. Hulle eet uit jou hand. Jy kan 'n koi ook leer om nader te swem, sodat jy sy kop kan krap. So stil-stil kan 'n koi tot 'n meter lank word en naderhand 10 kg weeg. Hulle word oud en nuuskierig en hou jou altyd uit die water dop. Elke jaar wanneer die visdamme skoongemaak word, word goudvissies verkoop. Gewoonlik in September, maar vanjaar vroeër, om hulle 'n langer broeiseisoen te gee. In die verlede het kinders en ma's en pa's byna oormekaar geval om vissies te koop. Kom dus vroeg, want baie kopers is ook vistelers met baie geld. Heel klein goudvissies van sowat 75 mm (3 dm) kos R3 50 stuk; middelslag van 75 mm tot 100 mm (tot 4 dm) R5,50 en grotetjies, van 125 mm (5 dm) en groter R7. Die klein koi'tjies van sowat 75 mm kos ook R3,50 stuk en middelslag (75 mm tot 100 mm) R5,50, maar die groteres, wat al baie nuuskierig is, haal (300 mm) R70 elk. Die heel grootste makkes van langer as 300 mm kos op hul nuuskierigste R100 stuk. Die vissies wat verkoop gaan word, is gister gevang. Party word gehou en vir hulle word die spuitfonteine ook sommer skoongeskrop en waterlelies oorgeplant. Soms word party uitgeruil om nuwe bloedlyne te kry, want met te veel inteling kom altyd probleme - wie wil nou 'n vissie hê wat jou nie uit pure nuuskierigheid dophou nie? En wat gaan jy maak as 'n koi na jou vinger hap as jy hom vir 'n krummeltjie middagete nader roep?