Die Burger 1995

Koi-vis sterf in ouderdom 226

Koi-visse verleen 'n nuwe dimensie aan die tuin.

KLINK na 'n visvang-storie? Indien jy dit nie glo nie, is jy uiteraard nog nie blootgestel aan die genot van die versameling van Koi-visse (en hulle langlewendheid) nie. Maar selfs meer ongelooflik is dat jou naaste tak van Stodels Kwekerye pas 'n ten volle toegeruste Koi-vis afdeling bekend gestel het. Dis die ware Jakob. So, of jy nou 'n 'Kohaku', 'Sanke' of 'Showa' aanhanger is nee, dis nie vorme van Oosterse verweerkuns nie, maar lede van die Gosanka reeks Koi-visse hoef jy nie verder as jou naaste Stodels Kwekery in Bellville of Kenilworth te soek nie. ``Koi-vis versameling,'' sê Robert Stodel, besturende direkteur van Stodels Kwekerye, ``is 'n baie lonende stokperdjie, en kan net soos tuinmaak deur die hele gesin geniet word.'' Koi-vis verleen ook 'n kleurvolle en interessante karakter aan die tuin en word toenemend gewild as 'n fokuspunt buite. In 1994 het Robert Stodel besluit om die water te toets vir die behoefte onder klante om 'n Koi-vis sentrum by die kwekery in Bellville te vestig. Hy was aangenaam verras oor die belangstelling in die gebied, en het Errol Cooper van The Real Mc Koi, 'n bekende Koi kundige, genader. Gou is 'n bloeiende Koi-vis akwarium met al sy toebehore gebou. Errol is geen onbekende aan die Koi- vis bedryf nie, aangesien hy reeds die laaste 20 jaar in Houtbaai sake doen. ``My klante kom van oral uit die groter Kaapstad gebied en is baie opgewonde oor die Koi- vis sentrums wat nou tot stand gebring is,'' sê hy. Koi-visse bied baie plesier om aan te hou, aangesien hulle in in 'n verskeidenheid helder kleure beskikbaar is en tot ongelooflike groottes kan groei. Nou nie heeltemal Moby Dick nie, maar Errol, eienaar van The Real Mc Koi, sê dat 'n Koi- vis onlangs in Japan dood is wat 1,5 meter lank was en 226 jaar oud geword het! Hy sê die visse is baie liefderyk (niks soos 'n koue vis hier nie!) en tot naby die oppervlak kom om te voer en oor die kop gestreel te word. Koi-vis kom oorspronklik uit China, maar Japan is nou die land wat die goeie bloedlinies ``gemonopoliseer'' het. Die meeste van die vis in Suid-Afrika is uit Japan ingevoer, wat hulle duur maak, maar die goeie nuus is dat 'n teler in Transvaal net sulke goeie voorraad teen 'n baie billiker prys aan handelaars verkoop. Terloops, dis nie die grootte van die vis wat sy prys bepaal nie, maar die kwaliteit. Die raad wat Errol bied, is om aanvanklik 'n paar goeie visse te koop en jou voorraad stelselmatig aan te vul namate jy dit kan bekostig. Nog raad: Moenie jou Koi-visse te klein koop nie eerder so tussen 12 en 15 cm, sodat die kleur reeds vasgestel is. Onthou groter is nie beter nie. Koi-visse groei gemiddeld 15 cm per jaar en sal gou 'n groot vis wees, sodat dit nie geskik is vir 'n gewone tenk waar goudvissies aangehou word nie. Moenie kortpad kies deur jou vis met kat- of hondekos te voer nie. Daar is spesiale Koi- vis pille beskikbaar wat hulle laat floreer. Indien jy 'n tuin, rotstuin of watertuin beplan, sluit 'n dam vir Koi-visse in hulle groei nie almal tot 1,5 meter nie!