Eikestad Nuus

Otters vreet visse
Earl Haupt



SELFS die visse by die Universiteit van Stellenbosch se Botaniese Tuin blyk nie meer veilig te wees nie.

'n 'Groen-oorlog' het nou tussen werknemers van die Botaniese Tuin en 'n otter-familie, wat gereeld die tuin se spoggerige visse verslind, uitgebreek.

Die Koi-visse was aanvanklik in dié tuin se leliedam, maar hulle moes onlangs na 'n ander dam in die tuin verplaas word.

Die rede daarvoor was dat die leliedam waarin die visse gewoon het, gelek en heelwat water verloor het. Die dam is toe leeggemaak en al die visse is na die ander dam geskuif.

Volgens Deon Kotzé, kurator van die Botaniese Tuin, is daar tydens die verskuiwing opgemerk dat die visse soos mis voor die son verdwyn, en dat sommige selfs dood op die terrein aangetref is.

Dié verskynsel het mense verbonde aan die tuin kwaai laat kopkrap ? net om later te ontdek dat die otter-familie doodluiters aan die duur visse weggelê het.

Die honger otters het skynbaar snags toegeslaan om só alle besoekers en werkers te ontduik. Daar word selfs nou gesê die visse het saans ná toemaaktyd reeds begin toeslaan.

Die departement Natuurbewaring is ingeroep om die saak te ondersoek, en het bevind dat 'n otter-familie in die tuin ingetrek en hulself aan die Koi-visse verlustig het.

Otters is aktiewe nagdiere. In een aand kan hulle glo tot 'n kwart van hul eie ligaamsgewig vreet.

Stellenbosse Koi's staan volgens die kenners nie juis veel kans teen dié kalante nie.

Aanvanklik is vermoed die otters het vanuit die Jonkershoek- gebied af dorp toe getrek, maar volgens Natuurbewaring verkies die otters in dié gebied veel eerder die krappe in die rivier.

'Indien die otters iemand se troeteldiere is, moet hulle die diere liefs kom haal,' het 'n werknemer van die Botaniese Tuin grappenderwys aan Eikestadnuus gesê.

Tydens hul ondersoek het Natuurbewaring verskeie tonnels in die Botaniese Tuin ontdek. Daar word vermoed dat die otters óf daarin bly óf die tonnels gebruik om by die damme waar die visse is, uit te kom.

Werknemers van die Botaniese Tuin moes bontstaan om die visse te probeer beskerm en talle 'sekuriteitsmaatreëls' is aangebring.

Boomstompe wat die waterpype blokkeer en die gapings onder die heinings toemaak, is aangebring, maar steeds het die visse snags deurgeloop.

Die Botaniese Tuin is nou ook gewikkel in 'n dilemma, want die otters is bewaarde spesies. Die Tuin en/of Natuurbewaring mag dus nie té fel teen die otters optree nie.

'Daar is eintlik niks wat ons daaraan kan doen nie. Die astetiese aspek van die Botaniese Tuin is vir ons baie belangrik, en elektriese of yster-heinings rondom dié damme sal nogal onaantreklik lyk,' sê Kotzé.

'Om eenvoudig aan te hou nuwe visse koop, sal boonop wees soos om geld in die water te gooi.'