Die volgende artikel het vanoggend in die Volksblad verskyn:

JOHANNESBURG. – As jy reken die afgelope maand of wat was besonder koud, is jy heeltemal reg.

Die gemiddelde temperature vir Julie was byna oor die land heen amper 2ºC kouer as die normale gemiddelde temperature (gemeet van 1971 af) vir dié maand.

Me. Elsa de Jager, ’n klimaatkundige van die Suid-Afrikaanse Weerdiens (SAWD), het gister gesê die land se gemiddelde temperature vir Mei en Junie vanjaar was egter effens warmer as dié van vorige winters.

“Vir die meeste van die land, waaronder gebiede om Johannesburg, Pretoria, Durban en Bloemfontein, was die gemiddelde temperature gedurende Julie laer as normaal.

“Dit is net Kaapstad wat ’n effens warmer Julie as normaal ervaar het.”

Bloemfontein se gemiddelde minimum temperatuur vir Julie (-3,9ºC) het die grootste afwyking (-1,8ºC) teenoor die normale gemiddeld getoon.

Die meeste nagte in Julie vanjaar was dus byna 2ºC kouer in Bloemfontein as in vorige Julie-maande.

Die gemiddelde maksimum temperatuur in Bloemfontein oor Julie vanjaar (16,1ºC) was ook heelwat kouer (-1,6ºC) as die normale gemiddeld.

Op dieselfde manier was Johannesburg se gemiddelde maksimum temperatuur vir Julie vanjaar (15,2ºC) sowat -1,7ºC kouer as die normale gemiddeld wat oor die jare in Julie aangeteken is.

Hierteenoor was Kaapstad se gemiddelde maksimum temperatuur vir Julie vanjaar (19,7ºC) ’n volle 2,1ºC warmer as die normale gemiddeld.

Die gemiddelde temperature oor Julie vanjaar vir Pretoria en Durban (10,9ºC en 16,2ºC) verteenwoordig afwykings van onderskeidelik -1,5ºC en -0,7ºC teenoor die normale gemiddeld.

“Julie was dus inderdaad ’n bietjie kouer oor die binneland en aan die ooskus as normaalweg,” het De Jager gesê. “Junie en Mei was egter weer effens warmer as normaal, so as ’n mens na die hele winter kyk, is die afwyking nie so groot nie.”