Ek sien ons President is nou ná die sokker so begeesterd oor nasiebou dat hy sommer ’n nasionale partytjie wil uitroep en dit nadat ons meer as ’n maand lank heeltyds gepaartie het.

Wat Dik Daan laat uitroep: “Om te dink die Nasionale Party gaan herleef! Wat ’n mooi gedagte!

“Dink julle ouens FW gaan leier word of gaan dit Kortbroek wees?”

Nee, ek weet ook nie, maar ek dink ons sal so stadig aan die werk moet kom, want Kersfees is om die draai.

En terwyl ek saam met die res van die land jubel oor ons groot sukses en Oom Seppie wat ons sommer 9 uit 10 gee, gril en ril ek soos ’n ou wat deur ’n slymerige seekat omhels word as ek “Olimpiese Spele” hoor.

Stadig oor die klippe, mense, ons moet nou eers huise bou en gatslagpaaie regmaak en ons skuld afbetaal.

Of is ek nou ’n ou nat broek?

Die een stukkie goeie nuus van die week is dat ou Snorre die volk plegtig belowe het dat Bakkies nie ’n boef is nie.

Dit is werklik gerusstellend om te weet en natuurlik ken sy liewe coachie en sy ma hom beter as ons gewone ouens.

Oom Johnny sê hy dink die slegste ding vir ou Bullebakkies is dat hy vir die volgende nege weke saam met ons ander manne die gewone ou goedjies in en om die huis sal moet doen wat gewone ouens soos ons maar heeldag en aldag moet doen as ons nie na Bakkies-hulle op TV kyk nie.

Dis nou die gewone Piete wat in drie maande minder verdien as Bakkies en die Boksombende vir ’n enkele verloortoets.

Ja, ou maat, jy gaan in die tuin werk, die trollie stoot in Pik en Betaal, kinders by die stoei en ballet gaan haal, arbeidsdispute met jou tuinman oplos en so aan en so voorts.

Laat dit vir jou ’n les wees!

En so van die tuiningenieurs gepraat: Net soos verlede jaar hierdie tyd het my David Donderdagoggend al bibberende kom aankondig dat hy nie kan werk nie, want daar’s fout met sy oë en toe ek vra maar wat’s fout, antwoord hy sowaar weer ewe koeltjies: “No Sêr, I cên’t see myself wêkking today, it’s too cold.”

Nee kyk, mense, hierdie ou koeligheidjie so kort op die hakke van die sokker het ons diep geraak.

Gelukkig was die spul uitlanders nie verlede week saam met my op Bultfontein nie en hulle is hier weg, vas onder die indruk dat ons die wêreld se sonskynparadys is.

Ja-nee, soos Dik Daan sê, dit was dié week so koud dat tot die politici hul hande in hul eie sakke gehad het.

Oom Johnny sê hy’t so koud gekry dat hy amper verlang het na 1970 en sy kliphard gevriesde army-tent daar by De Brug en dan moet jy weet hoe koud was dit!

En die voorspelling vir volgende week?

Gedeeltelik bewolk, gedeeltelik sonnig en gedeeltelik reg.

Die wonder van navorsing darem!

Dié week hoor ons dat ’n slim ou by die Duke-universiteit in Noord-Carolina (nie die een in Mpumalanga nie) uitgevind het dat die posisie van jou naeltjie die swaartekrag-middelpunt van jou liggaam bepaal en dis hoekom atlete se naeltjies hoër sit as swemmers s’n.

En ja, dis natuurlik ook hoekom Kriekie Januarie se naeltjie nader aan die grond sit as Victor Matfield s’n.

Slim, nè!