Vrou in sop ná sy bure se koi-visse braai


IGNA SCHNEIDER


LONDEN. 'n Pensioentrekker wat haar bure se koi-visse as deel van 'n 18 jaar lange twis vir aandete gebraai het, moet nou �35 000 (sowat R515 000) aan skadevergoeding en regskoste betaal.
Ellen Jones (75) van Surrey het glo die visse met 'n net in haar bure se visdam gaan vang. Sy het dit toe gebraai en buitekant gaan sit en eet sodat hulle haar oor die heining kon sien smul.
Sy het dit ontken.
Haar bure, mnr. Mark en Jane Fowler, het ook beweer Jones het hul lewe versuur deur onwettig partytjies te hou, dagga in haar tuin te kweek en herhaaldelik hul oprit te versper.
Haar onkonvensionele gedrag het glo die waarde van die Fowlers se dertiende-eeuse plaashuis van �240 000 (sowat R3,5 miljoen) in Newchapel verminder.
Hulle het oorspronklik skadevergoeding van �75 000 (meer as R1 miljoen) geëis.
Jones is deur die hof beveel om skadevergoeding sowel as twee derdes van haar bure se regskoste te betaal.
Regter Christopher Morris-Coole het die partye gevra om ``te probeer om 'n mate van harmonie te vind sodat hulle lewe nie versuur word deur voortdurende onenigheid nie die ergste wat ek in al my jare in dié beroep gesien het''.
Mnr. Fowler (45), 'n rekenmeester, het in die Lewes- hof getuig dat hy op 'n dag begin agterkom het van sy visse verdwyn.
Hy het later vir Jones en 'n werker, mnr. Charlie Rashbrook, buite sien sit. Hy het onraad vermoed toe Rashbrook vir hom skree: ``Lekker dag vir 'n braai, nè!''
``Ek het gedink hulle eet vis. Dit het gelyk asof hulle dit aspris doen ek het hulle nog nooit tevore daar sien eet nie,'' het Fowler gesê.

Dis 'n bliksemse duur ete daai!